PANEN
Dening: Widodo Basuki
sawise direwangi pindha adus kringet
anggone ngupakara tanduran iki
wis samesthine ing pungkase mangsa
bakal panen
– wong temen bakal tinemu, ndhuk!
ngono simbah aweh sesorah
ora mung manungsa buruh panggulawenthah
nanging tanduran uga tinitah
butuh tresna
butuh asih
– kang nandur wenang ngundhuh, ndhuk!
semono uga atimu kang wis sumadiya
dadi pasren lan uritane guritan
wis samesthine wenang ani-ani ulenan pari
sinubya suka sukur maring Allah
aja wedi marang kang bakal anjarah rayah
jalaran ing kono ana wewadi
bakal tumurune berkah
Comments
Post a Comment